皇崗口岸聯檢大樓嘅「港方口岸區」尋日正式成立，今早應保安局邀請，阿Mark推咗幾個活動同一眾立法會同事第一時間前往實地考察，見證咁重要嘅時刻。大家本住「早一日，得一日」嘅精神，推動新口岸盡快落成，為市民帶嚟前所未有嘅便捷！

今次考察，我除咗關注交通同通關模式，仲特別實測咗我一直喺委員會極度關注嘅「網絡通訊」情況：

實測 WIFI.HK：上下載直迫200MB，順暢無阻！

有留意開我發言嘅朋友都知，我非常著緊過關時嘅網絡體驗。目前新口岸大樓入面嘅電訊網絡由內地供應商提供，即係話大家喺大樓內打電話或者上網，需要依賴跨境漫遊。

不過大家放心，大樓內全面提供咗本港嘅免費 Wi-Fi（WIFI.HK）。我今日特登用軟件做咗個網速測試，人少少結果上下載速度竟然高達 200 幾 Mbps！WhatsApp send 相畀立法會同事，幾秒就搞掂；我亦試開咗部份香港專用嘅 Apps，全部順利連線，毫無障礙，日後過關處理電子程序絕對夠做！

嶄新「一次放行」與未來「無感過關」

新口岸最大亮點係首次採用「合作查驗、一次放行」。大家過關只需用「目的地證件」，即係香港去深圳用回鄉證，深圳返香港就用身份證。各方正探討緊未來任何方向用任何一張證都過到關；終極目標當然係連證都唔使攞出嚟嘅「無感過關」！我相信技術已經隨時 ready，只係有好多細節要再深入討論，大方向絕對令人期待。

首用需簽同意書？「e-道」App及早準備！

使用新通關模式，首次過關時需剔選同意書。好消息係，當局表示未來市民可透過「e-道」App 更新，事前以電子渠道辦妥同意書，以免個個去到閘機前先慢慢揀而影響流暢度。

我亦即場建議應將同意書內容清晰顯示喺過關大堂當眼處，等大家排隊時可以望吓內容，去到閘口一撳就過，唔使逐隻字睇，進一步加快流程！

直擊公共運輸交匯處（PTI）佈局

要真正便民，交通接駁係關鍵。根據現場展出規劃，各類坑位已落實：

專營巴士：8個上客位（6條日間+1條通宵線）、3個落客位。

專線小巴：3個上客位（3條日間+3條通宵線）、3個落客位。

跨境巴士：15個上客位（5條短途及長途線）、7個落客位。

的士：設約55個上客及輪候位，市區/新界/的士車隊共用8個落客位。為咗令大家嘅感覺更實在，我已經問緊運輸署其他唔同關口嘅相關設施有幾多，之後我會再update。

車檢「聯合一站式」：細心兼顧左右軚及高低車型

除咗旅客過關，汽車通關亦會採用「聯合一站式」嘅一次過檢驗。今次考察我留意到一個非常細心嘅位，車道嘅證件檢驗機左右兩邊都有設置，完美配合左軚同右軚車嘅唔同駕駛環境！而且部機仲可以升高降低，方便唔同車型（例如私家車同大型車）嘅司機輕鬆擺證件，設計相當人性化同貼地。

交通應對：三階段策略把關

1. 最大挑戰（開通首年）：新口岸開通第一年係真正考驗！運輸署必須做足預案同通關演練。過去部分關口特別日子大排長龍嘅亂象，絕對唔可以喺新皇崗重演！

2. 中期紓緩（2027年）：出年古洞站通車係好契機，當局應及早增加新口岸往返古洞站嘅接駁公交，善用新鐵路站疏導交通。

3. 長遠規劃（2034年）：當2034年北環綫鐵路項目全面通車，市民可更有效利用鐵路直接出入，長遠交通一定冇問題。

新皇崗口岸係推動「北部都會區」發展嘅重要樞紐。我會繼續密切監察各部門嘅準備工作，確保通關時路路暢通！

#新皇崗口岸 #一地兩檢 #一次放行 #WIFIHK #無感過關 #e道 #公共運輸交匯處 #交通規劃 #北部都會區 #新界西北 #智慧口岸