本年度沙田區巴士路線計劃經討論後，一共有3個方案修訂。講解到最後一個方案:

73H (沙田愉翠苑 - 大埔富蝶邨) 新線

雖然係醫院線性質，但係原方案不入圓洲角總站 (威爾斯親王醫院正門)。經地區組織及其他人士爭取，大埔方向會繞經圓洲角總站，方便往返威院嘅乘客行少啲，沙田方向就會喺聖羅撒設站。

另一項改動係喺崗背街及沙角/田園閣之間，繞入博康邨，近沙田圍站附近設站。相信有助沙田圍往返大埔嘅乘客，唔使行出大涌橋路乘搭九巴72A/74A或城巴79/B8，有更就腳嘅選擇。亦可預見又多一個競爭者爭奪沙田特快往返大埔嘅客源。