今年巴士路線建議80 (美林 - 觀塘碼頭) 改道作為「補償」，配合89B (沙田圍 - 牛頭角) 縮短至彩虹及大幅削減班次至只開上下午各3班。

80往觀塘方向有兩項改道: 過隆亨邨後不再轉右直上獅隧，改為先轉左，經迴旋處調頭後停靠新翠邨，再駛上獅隧(即與87B往九龍一樣)。80上午不經顯徑特別班唔會改道，因為本身已經停呢個站。

此外，過黃大仙之後不經鑽石山站及牛池灣村， 改經新蒲崗及彩虹，以及加停啟業邨，作為89B大幅削減服務後由大圍往新蒲崗嘅代替品。

雖然望落只係「小改動」，不過我哋仲未講解方案嘅時候，已有大量街坊留言同pm反對方案，因此我哋明確反對80繞經新翠。就算89B要大幅削減班次，亦無理由將唔關事嘅80搞到迂迴曲折，白白浪費全個大圍嘅時間。係有心補償嘅，就應該加返多少80同埋80X嘅繁忙時間班次，唔使搞埋啲無謂嘢。